Monthly Archives: حوزه‌یران 2026

یاداشتی لێکتێگەیشتن لە نێوان زانکۆی پۆلیتەکنیکی هەولێر و زانکۆی میسر بۆ زانست و تەکنەلۆجیا واژۆ کرا

​لە پەراوێزی کارەکانی (٣١)هەمین دیداری زانکۆکانی وڵاتانی عەرەبی بۆ ئاڵوگۆڕی دەرفەتی مەشق و ڕاهێنانی قوتابیان، و بەمەبەستی پەرەپێدانی پەیوەندییە زانستی و ئەکادیمییەکانی نێوان زانکۆی پۆلیتەکنیکی هەولێر و زانکۆی میسر بۆ زانست و تەکنەلۆجیا، یاداشتێکی لێکتێگەیشتنی ستراتیژی لەنێوان پ.د. ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر، و پ.د. هالە ئەلمەنوفی، سەرۆکی زانکۆی میسر بۆ زانست و تەکنەلۆجیا واژۆ کرا.

تەوەرە سەرەکییەکانی یاداشتی لێکتێگەیشتنەکە بریتییە لە بەستنی کۆنفرانسی زانستیی بەردەوام و بۆ ئەمەش هەردوولا ڕێککەوتن لەسەر بەهێزکردنی هاوکارییە زانستییەکانیان لە ڕێگەی ڕێکخستنی کۆنفرانسی هاوبەش لە بواری پزیشکیدا. لەم چوارچێوەیەشدا، بڕیارە لە کۆتایی مانگی تشرینی یەکەم یەکەمین کۆنفرانسی زانستیی هاوبەش لە بواری پزیشکی لەنێوان هەردوو زانکۆ بەڕێوە بچێت.

​ پرۆگرامی بڕوانامەی هاوبەش (Double Degree)خاڵێکی دیکەی یاداشتەکەیە و لەم چوارچێوەیەدا و بە مەبەستی بەرزکردنەوەی ئاستی ئەکادیمیی قوتابییان، کاردەکرێت بۆ جێبەجێکردنی پرۆگرامی بڕوانامەی هاوبەش (Double Degree)، بە تایبەتی لە بەشە پزیشکییەکانی وەک پەرستاری و شیکاری نەخۆشییەکان و میکانیزمی جێبەجێکردنی پرۆگرامەکە بەجۆرێکە کە قوتابی سێ ساڵی خوێندن لە زانکۆی پۆلیتەکنیکی هەولێر و ساڵێک لە زانکۆی میسر بۆ زانست و تەکنەلۆجیا تەواو بکەن، یان بە پێچەوانەوە، قوتابییانی لایەنی بەرانبەر پاش تەواوکردنی دوو ساڵ خوێندن، دوو ساڵەکەی تر لە زانکۆمان تەواو بکەن، بە مەبەستی بەدەستهێنانی بڕوانامەی بەکالۆریۆسی هاوبەش لە لایەن هەردوو زانکۆوە.

پ.د. ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر، بەشداریی لە کارەکانی ٣١هەمین دیداری زانکۆکانی وڵاتانی عەرەبی بۆ ئاڵوگۆڕی دەرفەتی مەشق و ڕاهێنانی قوتابیان کرد، کە لە نێوان زانکۆکانی ئەندام لە یەکێتی زانکۆکانی عەرەبی لە زانکۆی (میسر بۆ زانست و تەکنەلۆجیا) لە وڵاتی میسر میوانداریی کرا.

لە ڕێوڕەسمی کردنەوەی دیدارەکەدا، کە بە ئامادەبوونی پ.د.عەمرو عیزەت سەلامە ئەمینداری گشتی یەکێتی زانکۆکانی وڵاتانی عەرەبی و پ.د. فەواز ئەحمەد زەغوول، بەڕێوەبەری ئەنجوومەنی عەرەبی بۆ مەشق و داهێنان لە یەکێتی زانکۆکانی وڵاتانی عەرەبی، و ژمارەیەک لە سەرۆک و نوێنەرانی زانکۆکانی ئەندام دەستی پێکرد؛ چەندین وتار و بابەتی زانستی پێشکەش کران.

دوای پێشکەشکردنی بابەتەکان، پرۆسەی ئاڵوگۆڕی قەڵغانی زانکۆکان بەڕێوەچوو، کە تیایدا پ.د.ئیدریس محەمەدتاهیر هەرکی، قەڵغانی زانکۆی پۆلیتەکنیکی هەولێری پێشکەش بە ژمارەیەک لە زانکۆ بەشداربووەکان کرد و لە بەرامبەریشدا قەڵغانی ڕێزلێنان بەخشرایە زانکۆی پۆلیتەکنیکی هەولێر.

هاوکات لە بەشێکی تری دیدارەکەدا، پرۆسەی ئاڵوگۆڕی دەرفەتی مەشق و ڕاهێنان لە نێوان زانکۆکاندا جێبەجێ کرا، لەم چوارچێوەیەدا زانکۆی پۆلیتەکنیکی هەولێر ، تۆمارکردنی ژمارەیەکی پێوانەیی نوێی تۆمارکرد کە ئەمساڵ زیاتر لە (٥٠) قوتابی لە زانکۆکانی وڵاتانی عەرەبی لە هەریەک لە وڵاتانی (لوبنان، ئوردن، سەڵتەنەتی عومان، و میسر) لە بەشدار دەبن لە مەشقی هاوینە لە زانکۆی پۆلیتەکنیکی هەولێر ، لەوانە وڵاتانی: دەرفەتی مەشق و ڕاهێنانی بۆ قوتابیانی زانکۆ عەرەبییەکان ڕەخساند بۆ ئەوەی لە داهاتوودا بۆ ئەنجامدانی مەشقی هاوینە سەردانی زانکۆکە بکەن، لە بەرامبەریشدا چەندین دەرفەتی مەشق و ڕاهێنانی لەو زانکۆیانەوە بۆ قوتابیانی زانکۆی پۆلیتەکنیکی هەولێر مسۆگەر کرد.

لە پەراوێزی کارەکانی ئەم دیدارە نێودەوڵەتییەدا، سەرۆکی زانکۆی پۆلیتەکنیکی هەولێر لەگەڵ پ.ی.د.عەبدوڵڵا عومەر یاسین بەڕێوەبەری پەیوەندییە نێودەوڵەتییەکان زنجیرەیەک دیداری لەگەڵ شاندە بەشداربووەکان ئەنجامدا. لەو دیدارە دووقۆڵییانەدا، گفتوگۆ لەسەر بەهێزکردنی پەیوەندییە زانستی و ئەکادیمییەکانی نێوان هەردوولا  و هەنگاونان بۆ واژۆکردنی یاداشتی لێتێگەیشتنی فەرمی لە داهاتوودا کرا.

بەپێی ئەو داتایانەی کە لەلایەن ئەنجوومەنی عەرەبی بۆ مەشق و داهێنان لە یەکێتی زانکۆکانی وڵاتانی عەرەبی خرایەڕوو، زانکۆکانی هەرێمی کوردستان پێگەیەکی پێشەنگیان هەبووە و ژمارەی پێوانەیی گەورەیان تۆمارکردووە کە سێیەم بوون لەسەر ئاستی سەرجەم زانکۆکانی وڵاتانی عەرەبی لە پرۆسەی وەرگرتن و ناردنی قوتابیاندا. و جێگەی خۆشحاڵی و شانازییە کە زانکۆی پۆلیتەکنیکی هەولێر یەکێکە لەو زانکۆ دیارانەی هەرێمی کوردستان کە بە شێوەیەکی بەرچاو زۆرترین قوتابی وەرگرتووە و ناردووە.

 

بەمەبەستی پەرەپێدانی پڕۆگرامەکانی خوێندن و هاوتەریبکردنیان لەگەڵ پێشکەوتنە تەکنەلۆجی و زانستییەکانی سەردەم، بەسەرپەرشتی پ.ی.د. بۆتان مەجید ئاسنگەر، یاریدەدەری سەرۆکی زانکۆ بۆ کاروباری زانستی و خوێندنی باڵا، کۆبوونەوەیەک لەگەڵ سەرۆکی هەر پێنج لیژنەی کەرتە پسپۆڕییەکانی زانکۆ (تەکنەلۆجی و ئەندازیاری، کارگێڕی، تەندروستی و پزیشکی، کشتوکاڵی، کۆمپیوتەر و ئایتی)، بەڕێوەبەری پەرەپێدانی پڕۆگرامەکانی خوێندن و بەڕێوەبەری سەنتەری پەرەپێدانی کار ئەنجامدرا.

لە کۆبوونەوەکەدا دوو بڕیاری ستراتیژی و گرنگ بۆ سەرجەم بەشە زانستییەکانی زانکۆ تاوتوێ کران و پەسندکران: کەبریتی بوون زیادکردنی مۆدیۆلی “ژیری دەستکرد” بۆ پڕۆگرامەکانی خوێندن لە سەرجەم بەشە زانستییەکانی زانکۆمان، کە زیاتر لە ٨٠ بەش لە خۆدەگرێت ئەمەش لە پێناو ئاشناکردنی نەوەی نوێ بە تەکنەلۆجیای سەردەم.

ئەم هەنگاوە بە ئامانجی بەرزکردنەوەی ئاستی هۆشیاریی گشتی قوتابییان دێت لەسەر پرسی ژیریی دەستکرد، بەتایبەت لە ڕووی ڕێسا و ڕێنماییەکانی بەکارهێنان، ڕەوشتی بەکارهێنان ، و شێوازی بەکارهێنانی دروست لە کایە جیاوازەکانی بە شێوازێک کە خزمەت بە مرۆڤایەتی و لایەنی زانستی بکات.

بۆ ئەم مەبەستەش، کۆلێژی تەکنیکی ئەندازیاری کۆمپیوتەر و ئینفۆرماتیک ڕاسپێردرا بۆ داڕشتنی پڕۆگرامێکی تایبەت و گونجاو بۆ ئەم پسپۆڕییە.

جێبەجێکردنی پڕۆگرامی کار و کارسازی تەوەرێکی دیکەی کۆبوونەوەکە بوو، ئەمەش پشتبەستن بە ڕاسپاردەی وەزارەتی خوێندنی باڵا و توێژینەوەی زانستی حکومەتی هەرێمی کوردستان، و دوای ئەنجامدانی چەندین وۆرکشۆپ و خولی ڕاهێنان بۆ مامۆستایان و لەگەڵ دانانی پڕۆگرامی تایبەت، بڕیاردرا بە دانانی بابەتی کار و کارسازی لە ناو سیستمی خوێندنی هەموو بەش و پسپۆڕییەکاندا. ئەم بابەتە بە دوو بەشی جیاواز دەخوێندرێت کە بریتییە لە بابەتی پەرەپێدانی کار و تواناکان و بابەتی کارسازی و لێهاتووییەکان.

ئامانجی سەرەکی ئەم پڕۆگرامە، پڕچەککردنی قوتابییانە بە بیرۆکەی داهێنەرانە و پەرەپێدانی لێهاتووییەکانیان، تا لە کاتی دەرچوونیاندا لە زانکۆ، تەنها چاویان لە دامەزراندنی کەرتی گشتی نەبێت، بەڵکو بتوانن لە بازاڕی کاردا ڕوو لە کەرتی تایبەت بکەن و خۆیان ببنە خاوەن کار و پڕۆژەی سەربەخۆی خۆیان.

هەر لە کۆبوونەوەکەدا چەندین پێشنیازی بەسوود و تێروتەسەل بۆ دەوڵەمەندکردنی زیاتری ئەم بابەتانە خرانە ڕوو، کە لە داهاتوویەکی نزیکدا بڕیاری کۆتاییان لەسەر دەدرێت و دەخرێتە ناو پڕۆگرامەکانی خوێندن لە زانکۆمان.

 

لەژێر چاودێری و بە ئامادەبوونی پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر، و بە بەشداربوونی ژمارەیەکی بەرچاو لە ڕاوێژکارانی سەرۆکایەتی هەرێمی کوردستان، سەرۆک زانکۆکان، و بەرپرسانی باڵای حکوومی و حزبی، ڕێوڕەسمێکی شایستە بۆ ناساندن و بڵاوکردنەوەی کتێبی (گوتاری سەرۆک نێچیرڤان بارزانی ٢٠١٩-٢٠٢٥ دەروازەیەک بۆ شرۆڤەی زانستی کۆی وتارەکانی) بەڕێوەچوو.

سەرەتای ڕێوڕەسمەکە بە خولەکێک وەستان بۆ گیانی پاکی شەهیدانی کوردستان لەگەڵ مارشی نیشتمانیی ئەی رەقیب دەستی پێکرد.

دواتر پ.د.ئیدریس محەمەدتاهیر هەرکی لە وتەیەکدا بەناوی خۆی ئەنجوومەنی زانکۆی پۆلیتەکنیکی هەولێر بەخێرهاتنی ئامادەبووانی کرد و دەستخۆشی لە نووسەرانی کتێبەکە د. زاهیر حەمەدەمین و م. ئەرسەلان ڕەحمان کە هەردووکیان مامۆستان لە زانکۆی پۆلیتەکنیکی هەولێرن.

سەرۆکی زانکۆ رایگەیاند، لە سەرەتای دەستبەکاربوونمانەوە دیدگای ئێمە ئەوە بووە کە زانکۆ تەنها ناوەندێک نییە بۆ پێدانی زانست و مەعریفە بەڵکو ئەرکی زانکۆ خزمەتکردنی کۆمەڵگایە لە رێگەی کارکردن لە بوار و رەهەندە جیاوازەکانی دیکەیشەوە.

سەرۆکی زانکۆی پۆلیتەکنیکی هەولێر باسی لە رۆڵی کاریگەری سەرۆکی هەرێمی کوردستانی کرد لەسەر ئاستی ناوخۆیی و هەرێمی و نێودەوڵەتی و هەنگاوە دیپلۆماتییەکانی بەڕێزیان لە چارەسەرکردنی کێشەکان بە گرنگ و کاریگەر وەسف کرد.

لە بارەی ناوەڕۆکی کتێبەکەیش، سەرۆکی زانکۆی پۆلیتەکنیکی هەولێر جەختی لەوە کردەوە کە ئەم کتێبە تەنها دۆکیۆمێنتکردنی قۆناغێکی مێژوویی نییە، بەڵکو دەروازەیەکی زانستی قووڵە بۆ تێگەیشتن لەو پەیامە نیشتمانی، دیپلۆماسی و کۆکەرەوانەی کە جەنابی سەرۆکی هەرێمی کوردستان لە گوتارەکانیدا پەیڕەوی کردووە و رایگەیاند کە زانکۆی ئێمە هەمیشە پاڵپشتی لەم جۆرە توێژینەوە زانستییە بەپێزانە دەکات کە خزمەت بە گەشەکردنی هزری سیاسی و ئەکادیمی لە هەرێمەکەماندا دەکەن.

لە بەشێکی دیکەی رێوڕەسمەکەدا هەردوو نووسەری کتێبەکە د. زاهیر حەمەدەمین و م. ئەرسەلان ڕەحمان  بە جیا، تیشکیان خستە سەر ناوەڕۆکی کتێبەکە کە تێیدا نووسەران بە شێوازێکی زانستی و بەپشتبەستن بە مێتۆدۆلۆژیای شیکاریی گوتار، کاریان لەسەر ڕەهەندە جیاوازەکانی پەیامەکانی سەرۆکی هەرێمی کوردستان نێچیرڤان بارزانی لە ماوەی شەش ساڵی ڕابردوودا (٢٠١٩-٢٠٢٥) کردووە.

دواتر قەڵغانی رێزلێنان لەلایەن پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر پێشکەش بە نووسەرانی کتێبەکە کرا.

 ڕێوڕەسمەکە بە دابەشکردنی کتێبەکە بەسەر ئامادەبووان و سوپاس و دەستخۆشی لە ماندووبوونی نووسەرانی بەرهەمەکە کۆتایی هات.