لە چوارچێوەی بەشداریکردن لە ڕاهێنانەکانی پڕۆژەی (RISE) لە وڵاتی ئیتاڵیا، شاندێکی زانکۆی پۆلیتەکنیکی هەولێر بە سەرۆکایەتیی پ.ی.د. بۆتان مەجید ئەحمەد، یاریدەدەری سەرۆکی زانکۆ بۆ کاروباری زانستی و خوێندنی باڵا و بە یاوەریی پ.ی.د. عەبدوڵڵا عومەر یاسین، بەڕێوەبەری پەیوەندییە نێودەوڵەتییەکان و خاتوو پێرۆ بۆتان، لە شاری ڕۆما دیدارێکیان لەگەڵ سەرۆکایەتیی زانکۆی نێودەوڵەتیی ڕۆما (UNINT) ئەنجام دا.
لە دانیشتنەکەدا کە پڕۆفیسۆر مارگریزیا ڕوسۆ، سەرۆکی زانکۆی نێودەوڵەتیی ڕۆما و پڕۆفیسۆر لوچانۆ نادو، جێگری سەرۆکی زانکۆ بۆ کاروباری نێودەوڵەتی ئامادەی بوون، دوای گفتوگۆیەکی چڕی ئەکادیمی سەبارەت بە ئاڵوگۆڕی زانستی و ئەزموونیی، هەردوو لا یاداشتێکی لێکگەیشتنیان واژوو کرد بۆ پتەوکردنی پەیوەندییەکانی نێوانیان و ئەنجامدانی کاری هاوبەش لە داهاتوودا.
ئەم دەستپێشخەرییە وەک بەشێک لە دیدگا و ستراتیژیی زانکۆی پۆلیتەکنیکی هەولێر دێت بۆ بەنێودەوڵەتیکردنی زانکۆکە و کردنەوەی دەروازەی نوێ بە ڕووی جیهانی دەرەوەدا. سەرۆکایەتیی زانکۆ هەمیشە جەخت لەسەر ئەوە دەکاتەوە کە بە بایەخەوە دەڕوانێتە ئەم جۆرە چالاکییانە و، بەردەوام پاڵپشت و هاوکاری سەرەکی دەبێت بۆ هەر هەنگاوێک کە ئاستی زانستیی زانکۆکە بەرزتر بکاتەوە و پەیوەندییە ئەکادیمییەکان لەگەڵ زانکۆ پێشەنگەکانی جیهاندا فراوانتر بکات.
